Pangulohan ni kanhi Sen. Antonio Trillanes IV, uban ang grupo nga The Silent Majority, ang pagpasaka og bag-ong kaso sa plunder ug graft batok kang Vice President Sara Duterte karong Miyerkules sa Office of the Ombudsman sa Quezon City.
Ang reklamo may kalabotan sa giingong anomaliya sa paggamit sa pondo sa panahon nga siya nagserbisyo isip kalihim sa Department of Education ug alkalde sa Davao City.
Sumala kang Trillanes, ang tumong sa kaso mao ang ipatubag si Duterte sa mga alegasyon sa sayop nga pagdumala sa pondo sa katawhan.
Kahinumduman nga niadtong Oktubre 2025, nagpasaka usab si Trillanes og reklamo batok sa kanhi Pangulo Rodrigo Duterte ug Senador Bong Go kalabot sa giingong iregular nga paghatag sa bilyones nga mga proyekto.
Ang maong lakang kabahin sa mas lapad nga kampanya ni kanhi senador aron ipalambo ang transparency ug accountability sa gobyerno.
Sa kasamtangan, wala pa’y pahayag ang kampo ni VP Duterte bahin sa maong isyu.