Nakasinati ang ubay-ubay nga barangay sa matag munisipyo sa Bukidnon ug kusog nga pag-ulan niining mga adlaw, lakip niini ang pagbaha sa pipila ka bahin sa probinsiya.
Gumikan sa kusog nga pag-ulan, dunay mga residente nga naapektuhan sa pagtaas sa tubig hilabi na sa mga lumulupyo nga anaa gapuyo duol sa kasapaan ug tulay.
Muabot sa 130 ka mga pamilya gikan sa Barangay Sumalsag sa lungsod sa Malitbog Bukidnon ang nagpabilin karon sa evacuation center tungod sa hulgang pagbaha nga hatud sa kusog nga mga pag-ulan sa probinsya sa Bukidnon.
Sumala ni Office of the Civil Defense Region 10 thru Regional Director Antonio Sugarol, subay sa ilang pagmonitor sa sensor, naa sa alert level 2  karon ang maong barangay diin nagpasabot nga dunay paglihok sa yuta, rason nga gipatuman ang pre-emptive evacuation sa mga residente sa proper 1 , 2 , Babagyuhan og Sitio Apiki.
Gawas sa pagmonitor sa paglihok sa yuta duna usab pagmonitor sa suba, pinaagi sa tabang sa Municipal Disaster Risk Reduction and Management Office gikan sa Malitbog, kansa ang status gipailawom sa yellow level.