Nagtuo si Bukidnon 2nd District Rep. Jonathan Keith Flores nga kulang sa lig-on nga basehan ang gi-file nga impeachment complaint batok kang Presidente Ferdinand Marcos Jr.
Sa eksclusibong pakighinabi sa Bombo Radyo Philippines, gibutyag ni Flores nga bisan wala pa niini hingpit nga nabasa ang tibuok kopya sa reklamo, makita nga dili igo ang mga rason aron makakuha kini og dakong suporta gikan sa mga magbabalaod.
Gihisgutan sa kongresista ang duha ka mga nag-unang punto sa reklamo sama sa giingong pagtugot sa gobyerno sa pagdakop kang kanhi Presidente Rodrigo Duterte.
Matud ni Flores, obligasyon sa Pilipinas ang mokooperar sa International Criminal Police Organization. ug ang wala pag-veto ni PBBM sa unprogrammed funds.
Giklaro ni Flores nga katungod sa Presidente ang pag-veto o dili ug ang posibleng sayop anaa sa paggamit sa pondo sa implementing agencies, dili sa desisyon sa Presidente.
Dugang pa ni Rep. Flores nga dunay “loophole” sa balaod diin kung kinsa ang unang maka-file, mao nay sundon, apan duna pay higayon ang uban nga mag-sumite og mas lig-on nga reklamo sa dili pa kini hingpit nga ma-proseso.
Kasamtangan, gihulat pa sa mga kongresista ang opisyal nga pag-transmit sa reklamo ngadto sa Office of the House Speaker aron masugdan ang pormal nga pagdungog niini.