Kritikal ang kondisyon sa usa ka drayber human magsungag ang usa ka motorsiklo ug sakyanan sa may Purok -6B Brgy. Aglayan Malaybalay City, Bukidnon karong adlawa, Enero 20.
Giila ang biktima nga si Rolen Colipano Cuevas, 20 anyos ug residente sa Purok-6 Bagong Silang Maligaya ning dakbayan diin wala nagsul-ob g helmet ug gituohang kusog ang dagan sa motorsiklo sa dihang misulay kini pag-overtake sa tuo nga bahin.
Matud ni Rufil Yurong, BPSO Chief sa Brgy. Aglayan, wala mabantayi sa biktima ang sakyanan nga pasulod sa garahian hinungdan nga nahitabo ang bangga.
Nadaot pag-ayo ang atubangan sa sakyanan samtang halos wasak ang motorsiklo tungod sa kusog nga impact.
Dugang pa ni Yurong nga ang biktima kasamtangang On-the-Job training sa Oro Cooperative ug wala pay pamilya nga miabot human sa aksidente busa nag radyo na lamang kini sa CBO sa Brgy. Maligaya aron mapahibalo ang kahimtang niini ngadto sa pamilya.