Gisiguro ni Department of the Interior and Local Government (DILG) Secretary Jonvic Remulla nga walay special treatment alang kang kanhi Senator Ramon “Bong” Revilla Jr..
Gipadayag sa kalihim nga personal siyang gitawagan ni Revilla human masayran nga adunay inisyung arrest warrant batok kaniya.
Giklaro ni Remulla nga sama sa ubang detainee, si Revilla misunod dayon sa standard booking ug custodial procedures ug gisusi ang iyang mga katungod pag-abot sa Crame.
Miagi usab ang kanhi mambabalaod sa tibuok proseso nga gikinahanglan alang sa boluntaryong pagtahan.
Isip bahin sa proseso, gikinahanglan ni Revilla nga isuko ang iyang 20 ka lisensiyadong pusil.
Sa wala pa siya nitahan, nagpahayag si Revilla og kasubo tungod sa kakulang sa due process nga nagresulta sa pag-isyu sa arrest warrant ug hold departure order batok kaniya.
Bisan pa niini, nangako ang kanhi Senador nga iyang atubangon ang mga kaso nga walay kahadlok ug kompyansang dili siya pasagdan sa Diyos, tungod kay inosente siya, ug nangayo og pag-ampo para kaniya ug sa iyang pamilya.