Gi-aresto na sa mga operatiba sa National Bureau of Investigation (NBI) ang duha ka kanhi opisyal sa DPWH Bulacan 1st District Engineering Office nga silang Brice Hernandez ug Jaypee Mendoza. Ang pag-aresto gihimo human mogawas ang warrant of arrest gikan sa Sandiganbayan Third Division kagahapong adlawa, Enero 19, 2026.
Ang duha nag-atubang og seryosong kaso sa Graft ug Malversation may kalambigitan sa giingong P92.8-milyon nga “ghost flood control project” sa Pandi, Bulacan. Sa maong proyekto, giingong gipagawas ang pundo apan wala matuman ang trabaho. Kahinumduman nga kaniadtong Septyembre 2025, pormal na nga gitangtang sa serbisyo silang Hernandez ug Mendoza human mapamatud-ang nalambigit sa administratibong kaso sa grave misconduct ug gross neglect of duty.
Gawas sa duha, nalakip usab sa maong warrant ang pipila pa ka opisyal sa DPWH ug si Senador Bong Revilla, kinsa gipasakaan usab og Hold Departure Order (HDO) aron dili makagawas sa nasud samtang nagpadayon ang kaso. Sa pagkakaron, anaa na sa kustodiya sa NBI ang mga dinakpan alang sa tukmang proseso sa balaod.