Gitoohan karon nga nakagawas na sa Pilipinas ang negosyanteng si Charlie “Atong” Ang, kinsa giisip na nga usa ka pugante.
Kini sumala sa pamahayag ni Julie “Dondon” Patidongan, ang whistleblower sa kontrobersyal nga kaso sa mga missing sabungero.
Gibutyag ni Patidongan nga dako ang iyang pagtuo nga wala na sa nasud si Ang sukad pa niadtong Disyembre gumikan duna kini koneksyon sa internasyonal nga grupo.Bag-ohay lang nagpagawas ang Sta. Cruz, Laguna RTC Branch 26 og warrant of arrest batok kang Ang ug 17 ka uban pa alang sa kasong Kidnapping with Homicide.
Ang Department of Interior and Local Government (DILG) nagtanyag na og P10-milyon nga reward alang sa makatdlo sa impormasyon sa nahimutangan ni Ang.
Tungod sa mga report nga posibleng anaa na sa gawas sa nasud ang suspetsado, ang PNP-CIDG nihangyo na og Interpol Red Notice niadtong Huwebes aron masubay ang lihok niini.
Gawas sa warrant gikan sa Laguna, duna usab laing warrant of arrest nga giisyu ang Lipa, Batangas RTC batok kang Ang ug 20 pa ka mga kauban alang gihapon sa susamang kaso.