Andam na ang Pinay tennis sensation nga si Alex Eala sa iyang labing unang pagpakita sa main draw sa Australian Open karong Dominggo, Enero 18, didto sa Melbourne, Australia.
Makasangka ni Eala (WTA No. 49) sa unang round ang Amerikana nga si Alycia Parks, kinsa kasamtangang anaa sa ika-100 nga pwesto sa world rankings. Kini ang unang higayon nga mag-abot ang duha sa sulod sa court.
Si Eala nadasig sa iyang nindot nga performance bag-ohay lang human siya niabot sa semifinals sa ASB Classic sa New Zealand ug nilupig sa pambato sa Croatia nga si Donna Vekic sa exhibition match sa Kooyong Classic.
Kon modaog si Eala batok kang Parks, mamahimo niyang makasangka sa ikaduhang round ang modaog tali ni Karolina Muchova (No. 19) o Jaqueline Cristian (No. 37).
Gawas sa dungog sa nasod, importante usab kini nga dula tungod kay ang iyang dagan sa Australian Open maoy magdetermina kon makasalmot ba siya sa umaabot nga Philippine Women’s Open karong Enero 26 sa Manila.