Gipasalig sa Malacañang nga himoon ni Presidente Ferdinand Marcos Jr. ang tanang gikinahanglan alang sa kaayohan sa Armed Forces of the Philippines (AFP) samtang gihan-ay na ang bag-ong AFP Modernization Law.
Kini nga bag-ong balaod maoy muhulip sa kasamtangang modernization law nga gitakdang mapupos sa tuig 2027.
Matud ni Palace Press Officer Undersecretary Claire Castro, suportado sa Presidente ang tanang lakang aron mas mapalig-on pa ang depensa sa nasud.Kasamtangan, gipahigayon na sa AFP ang pag review sa ilang modernization program.
Matud ni AFP Deputy Chief of Staff Lt. General Rommel Roldan, gikinahanglan ang pag-usab sa programa base sa security landscape ug aron matubag ang mga bag-ong hulga sa seguridad sa Pilipinas.Gidugang ni Roldan nga aktibo na silang naghatag og technical advice sa Department of National Defense (DND) ug sa Kongreso alang sa pagpanday sa maong bag-ong balaod.
Gipasalig usab sa heneral nga adunay igong pundo ang modernisasyon karong tuig 2026. Kini naglangkob sa ₱40 bilyones nga budget ug dugang ₱50 bilyones nga unprogrammed appropriations nga nagpakita sa seryosong suporta sa gobyerno alang sa nasudnong seguridad.