Nakatakdang makigbatok pag-usab ang Pinay tennis sensation nga si Alex Eala batok sa pambato sa Croatia nga si Donna Vekic sa usa ka exhibition match sa prestihiyosong Kooyong Classic karong Miyerkules, Enero 14 (oras sa Australia).
Kini nga match nagsilbing rematch human sa makasaysayanong kadaugan ni Eala batok kang Vekic sa ASB Classic sa Auckland bag-ohay lang, diin nakuha sa Pinay ang 4-6, 6-4, 6-4 nga iskor.
Ang Kooyong Classic usa ka eksklusibong invitational tournament nga gipahigayon isip pagpangandam sa mga top players alang sa Australian Open. Gawas kang Eala ug Vekic, apil usab sa maong torneyo ang mga iladong magduduwa sama nila Daniela Hantuchova, Priscilla Hon ug ang mga pambato sa kalalakin-an nga sila si Alexander Zverev ug Nick Kyrgios.
Kini nga torneyo mahinungdanon alang sa 20-anyos nga si Eala, kinsa bag-o lang misaka sa iyang career-high nga World No. 49 sa WTA rankings. Gitan-aw kini nga iyang katapusang tune-up sa dili pa ang iyang gipaabot nga debut sa main draw sa Australian Open karong Enero 18.
Gipaabot nga mahimong hugot ang maong sangka tungod sa tinguha ni Vekic, ang kasamtangang World No. 70 ug Olympic silver medalist, nga makabawos sa kapildihan niini sa miaging semana.