Gipahayag sa mga opisyal sa kamarabaha nga dili prayoridad niini ang bisan unsang impeachment complaint batok kang Presidente Ferdinand Marcos Jr.
Kini human misulay ang grupong Duterte Youth sa pagpasaka og reklamo niadtong Mayo 8, 2025 nga wala dawata sa Office of the Secretary General.
Matud ni House Speaker Bojie Dy III, mas gihatagan og importansya sa Kamarabaha ang pagsulbad sa mga problema sa nasud, ilabi na sa sektor sa agrikultura ug food security, kaysa sa mga politikal nga lakang batok sa administrasyon.
Gisiguro usab ni Deputy Speaker Ronaldo Puno nga walay igong basehan aron ma-impeach ang Presidente. Midugang usab kini nga ang maong lakang walay suporta gikan sa mayorya sa mga magbabalaod tungod kay nagpabiling lig-on ang administrasyon ni Marcos Jr.
Ang reklamo nga giduso ni Ronald Cardema sa Duterte Youth naggumikan sa giingong pagtugot sa Presidente nga mapasulod ang ICC sa nasud aron dakpon si kanhi Presidente Rodrigo Duterte.
Gipahayag ni Cardema nga usa kini ka pagbudhi sa soberanya sa Pilipinas.Samtang, gipadayag sa Malacañang pinaagi ni PCO Undersecretary Claire Castro nga ang administrasyon nagpabiling nakatutok sa pagserbisyo sa katawhan ug dili manghilabot sa mga legal nga proseso bahin sa impeachment