Gisaulog sa Bombo Radyo Philippines ang ika-60 ka tuig sa media excellence pinaagi sa Top Level Management Conference nga gipahigayon sa Iloilo City sugod karung adlawa Enero 5 hangtod 11, nga adunay temang “Bombo Radyo Philippines: Celebrating 60 Years of Media Excellence.”
Gipangulohan ang kalihokan nila Chairman Dr. Rogelio M. Florete ug President ug Chief Executive Officer Margaret Ruth C. Florete, diin gitambongan kini sa mga station managers ug senior officers gikan sa 25 ka key areas sa Bombo Radyo Philippines network sa Iloilo City.
Ang usa ka semana nga panagtigom nagtutok sa strategic planning ug direction-setting isip pagpangandam sa network alang sa mosunod pang mga tuig.
Lakip sa mga pagahisgutan ang mga isyu sa inobasyon, pampublikong serbisyo, ug padayon nga pagtahod sa kredibilidad ug responsableng broadcasting.
Isip kabahin sa ika-60 nga anibersaryo, gipasiugda sa Bombo Radyo Philippines ang halapad nga lista sa mga prestihiyosong award sa natad sa news reporting, public affairs programming, ug public service broadcasting.
Lakip niini ang Bombo Network News, nga back-to-back winner sa Catholic Mass Media Awards (CMMA) isip Best News Program alang sa 2024 ug 2025, ug ang Star FM, nga giila isip Best Entertainment Program sulod sa tulo ka sunod-sunod nga tuig (2023–2025).
Samtang ang Bombo Radyo Iloilo, flagship station sa network, giila isip Best AM Station (Provincial) ug Best News Program (Provincial) sa 28th Golden Dove Awards (2025) sa Kapisanan ng mga Brodkaster sa Pilipinas (KBP).
Gipamatud-an usab sa mga independent survey ang kredibilidad ug pagsalig sa publiko sa Bombo Radyo.
Napili kini isip Most Trusted News and Information Source sa Radio category sa National Survey on Media and Information Literacy sa Philippine Information Agency (Nobyembre 2024).
Gi-ila usab sa OCTA Research (Disyembre 2024) isip nag-unang tinubdan sa balita ug impormasyon sa mga hamtong nga Pilipino, ug padayon nga nag-una sa quarterly Pahayag Survey sa Publicus Asia, Inc. sa kategoryang Most Trusted Media Outlets in the radio.
Ang tanang pasidungog kini maoy lig-on nga pamatuod sa dedikasyon sa Bombo Radyo Philippines sa pagmintinar sa labing taas nga sukdanan sa broadcast journalism.
Gipalig-on usab sa kumperensiya ang bansag sa Bombo Radyo isip nag-unang radio network sa nasud, nga adunay 32 ka digitalized AM ug FM stations sa tibuok Pilipinas, ug nagsilbi usab kini nga kinasing-kasing nga pasalamat sa publiko.
Ang inyung suporta usa kadakong bili, ang Bombo Radyo magpadayon sa paglambo s pagpadayag ug sa paghatod sa mga balita ug serbisyong publiko nga dili matupngan.