Nagpasalamat si Senador Francis “Kiko” Pangilinan ngadto sa Chinese Embassy sa Manila human ang maong embahada miingon nga ang Pilipinas adunay katungod sa pag-angkon sa West Philippine Sea (WPS) base sa mga balaod sa dagat.
Sumala sa pagpagawas sa embahada, ang duha ka nasod adunay naglain-lain nga maritime claims sa South China Sea ug pareho silang adunay katungod nga mopahigayon og mga kalihokan sa ilang tagsa-tagsa ka teritoryo.
Ang Chinese Embassy nagpasiugda nga ang maong mga isyu kinahanglan tukion ug epektibo nga dumalahan pinaagi sa diplomatikong pamaagi aron malikayan ang tensiyon sa rehiyon. Bisan pa sa pagpasalamat, giinsistir ni Pangilinan nga ang Pilipinas kinahanglang padayon nga protektahan ang soberanya ug legal nga maritime rights niini subay sa 2016 Arbitration Ruling ug sa United Nations Convention on the Law of the Sea (UNCLOS).
Giingon niya nga ang diplomatikong kalambigit sa China kinahanglan nga sundan sa klaro ug konkretong aksyon aron hunongon ang mga insidente sa pagpang-harass sa mga barko sa Philippine Coast Guard ug mga mangingisdang Pilipino sulod sa Exclusive Economic Zone (EEZ) sa nasod.
Si Pangilinan miingon usab nga ang pag-ila sa katungod sa Pilipinas sa WPS base sa UNCLOS mao ang yawe sa malungtarong kalinaw ug kooperasyon sa rehiyon, ug nanawagan siya nga ang gobyerno sa duha ka nasod magpadayon sa diplomatikong pag-estoryahay apan dili mokompromiso sa soberanya sa Pilipinas.