Gipahayag sa Makabayan bloc nga andam na silang muendorso og bag-ong impeachment complaint batok kang Vice President Sara Duterte sa higayon nga mo-lapse na ang “one-year bar rule” karong umaabot nga Pebrero 6, 2026.
Kini ang gikumpirmar ni ACT Teachers Partylist Representative Antonio Tinio human gideklarar sa Supreme Court nga unconstitutional ang naunang mga impeachment complaint tungod sa paglapas sa maong lagda ug kakuwang sa due process.Matud ni Tinio, bisan paman kon adunay pending nga Motion for Reconsideration sa korte, dili kini makapugong sa mga nagkadaiyang grupo sa pagduso og bag-ong reklamo.
Dugang pa niini, posibleng madugangan pa ang mga basehan sa impeachment gawas sa isyu sa confidential funds.Ubos sa Konstitusyon, dili mahimong pasakaan og sobra sa usa ka impeachment complaint ang usa ka impeachable official sulod sa usa ka tuig.
Tungod kay ang katapusang reklamo napasaka niadtong Pebrero 5, 2025, mamahimo na usab kining buhaton pag-usab sugod sa Pebrero 6 karong tuiga.Gawas sa Makabayan bloc, gipaabot usab nga mosuporta ang ubang progresibong grupo sama sa Bayan sa pag-file sa maong reklamo nga naglambigit sa giingong “betrayal of public trust.”
Kasamtangan, wala pay pormal nga tubag ang kampo ni VP Sara kalabot sa bag-ong bahad nga impeachment.