Independent Commission for Infrastructure dili na epektibo sa pagtuman sa mandato – Rep. De Lima

Nagpahayag si Mamamayang Liberal (ML) Party-list Representative Leila de Lima nga dili epektibo ang pagpatuman sa Independent Commission for Infrastructure human mikanaog sa ilang posisyon ang duha ka commissioner niini nga sila Rogelio “Babes” Singson ug Rosanna Fajardo. Matud ni De Lima, usa na lamang ka miyembro ang aktibong nabilin sa komisyon ug bisan pa man anaa pa si Executive Director Brian Hosaka dili kini igo aron makapahigayon og hapsay ug komprehensibong imbestigasyon sa mga alegasyon sa anomalya sa mga proyekto sa gobyerno. Tungod niini, giingon ni De Lima nga kulang na ang komisyon sa gahom, pondo ug suporta gikan sa administrasyon, hinungdan nga napakyas kini sa pagdakop og mga “big fish” nga nalambigit sa korapsyon sa pondo sa gobyerno bisan hapit na mahuman ang tuig. Isip posibleng solusyon, gisugyot ni De Lima ang pagdugang og mga miyembro sa komisyon aron masiguro ang tinuod nga pagka independente niini. Dugang pa, nanawagan usab kini sa hingpit nga pagtukod sa Independent Commission Against Infrastructure Corruption (ICAIC) aron mas lig-on ug mas epektibo ang kampanya batok korapsyon sa mga proyektong pang-imprastruktura.