Gipasidaan sa kasundaluhan ang publiko nga ang gitawag nga unilateral holiday ceasefire sa CPP-NPA wala’y kamatuoran ug usa lamang ka propaganda aron makakuha og simpatiya.
Sa pakighinabi sa Bombo Radyo Malaybalay kay Cpt. Ariel O. Asentista, Civil Military Operations Officer sa 89th Infantry Battalion na ang maong ceasefire nga ginapahibalo sa CPP-NPA matag holiday season wala gayud ginasunod sa mga rebelde.
Bisan pa nga usahay mopahunong o mopamenos sa operasyon ang tropa, padayon gihapon ang harassment ug ambush sa mga rebelde, hinungdan nga adunay mangangol nga mga sundalo tungod sa dili pagpanimalos isip pagtahod sa giila nga ceasefire. Giingon niyang sulod sa kapin 57 ka tuig, gigamit lamang kini isip estratehiya sa propaganda.
Giklaro usab niini nga ang Armed Forces of the Philippines motuman lamang og ceasefire kung adunay klarong mando gikan sa mas taas nga kamandoan. Sa pagkakaron, wala pay giisyu nga sugo, busa nagpadayon ang operasyon sa militar aron mapanalipdan ang katawhan ug mapugngan ang hulga sa mga armadong grupo.
Gipahayag sa opisyal nga ang maong ceasefire makahatag lamang og bakak nga pagbati sa kaluwasan sa komunidad. Matod niini, dili mahimong luwas ang katawhan samtang adunay armadong grupo, busa magpadayon ang presensya sa kasundalohan aron malikayan ang mas dakong kadaut sa komunidad.