Gipadayag karon Police Regional Office-Region 10 nga sa nagkaduol nga adlaw sa kapaskohan, nagkaduol na usab nga hingpit nang madeklarang insurgency free ang Rehiyon 10.
Sa eklusibong pakighinabi sa Bombo Radyo Malaybalay kang PMaj. Joann Navarro, tigpamaba sa PRO-10, gibutyag niini nga wala’y angay kabalak-an kabahin sa hulga sa insurgency tungod sa padayon nga operasyon sa kapulisan kauban ang ubang law enforcement agencies ug force multipliers.
Matud pa ni PMaj. Navarro, gipakusgan karon ang intensified police operations, lakip ang dugang nga patrols, checkpoints, ug intelligence monitoring, hilabina nga pito na lamang ka adlaw ang nahibilin adisir ang Kapaskohan.
Lakip usab sa gitutokan sa kapulisan ang pagmonitor sa Simbang Gabi ug Misa de Gallo, diin gikaingon nga nagmalinawon ang unang tulo ka mga kaadlawon sa mga relihiyosong kalihokan.
Dugang pa niini, padayon ang usab pagdeploy sa mga personnel sa mga simbahan ug dapit nga ginadumog sa katawhan aron masiguro ang kaluwasan sa tanang matang sa mga panagtigum.