Gipasalig sa BUSECO nga walay kalit nga brownout nga masinati sa tibuok Bukidnon karong kapaskohan.
Sa pakighinabi sa Bombo Radyo Malaybalay, gibutyag ni Christopher Dulfo, General Manager sa BUSECO, nga alerto ug operational ang shifting crew ug resident linemen sa matag munisipyo aron dali ipadangat kung adunay reklamo o report sa power interruption, sa bisan unsang oras.
Gipahibalo ni Dulfo nga gi-kansela ang tanan major maintenance works nga nanginahanglan og pagpawong sa kuryente sulod sa holiday season, samtang ang regular nga maintenance gihimo lang kung dili kinahanglan palungon ang linya.
Ang kooperatiba usab nag-monitor sa mga highly vegetated areas, ug sa maayong kahimtang sa panahon, na nagpakunhod ang risgo sa kalit nga brownout.
Sa pagkakaron, gi-barugan sa BUSECO nga padayon ang 24/7 response aron masiguro ang hapsay nga suplay sa kuryente sa tibuok lugar sa Bukidnon atol sa Simbang Gabi hangtod Enero ug sa tibuok kapaskohan.