Gipamugos sa Malacañang nga kinahanglan masuta ug makita ang kapin 13,917 ka flood control projects nga gi-report nga nahuman sa panahon sa administrasyon ni kanhi Presidente Rodrigo Duterte.
Sumala ni Palace Press Officer Usec. Claire Castro, importante nga tukion mga proyekto kay gigamit matud pa sa kampo ni Bise Presidente Sara Duterte ang isyu sa pagbaha aron samokon ang kasamtangang administrasyon ug aron matabunan ang mga anomalya sa nangaging administrasyon.
Saysay pa niini nga gikinahanglan nga masayran kung asa ug unsay resulta sa libo-libong flood control projects, ilabi na kay nagpadayon gihapon ang dagkong pagbaha bisan pa sa kadaghan sa mga proyekto nga makatabang unta nga makapugong niini.
Dugang pa ni Castro, importante nga ipakita ang tinuod nga epekto sa mga proyekto aron matubag ang pangutana nganong nagpabilin nga dakong problema sa baha sa nasud.