Gidunggab patay ang usa ka 19-anyos nga lalaki sa Kibanggay, Lantapan Bukidnon kagahapon sa kadlawon. Matod sa pakighinabi sa Bombo Radyo Malaybalay kay PMAJ Anthony Townend, hepe sa Lantapan Municipal Station, pasado alas 4:30 sa kadlawon kaghapong adlawa gikataho ng adunay insidente. Ang biktima nga giila nga si Junriel Hingong Sitoy, gikan sa silingan nga balay naghiwa og unod sa karne para sa fiesta sa Lantapan.
Samtang sa 1–2 kilometro gikan sa balay, giatangan matod pa kini sa tulo ka lalaki. Usa ra ka dunggaban sa tiyan ang miigo sa biktima nga miresulta sa pag-awas sa daghang dugo, hinungdan sa iyang kamatayon. Base sa inisyal nga imbestigasyon, walay kaaway ang biktima ug giingon nga trip lang ang maong pagpangdunggab.
Sa pagresponde sa kapulisan, wala na nila maabtan ang tulo ka suspetsado apan nabilin ang usa ka motor nga giingong gamit sa mga suspetsado. Pag-trace sa motor, nailhan kini nga usa ka repo ug nakigkoordinar ang daang tag-iya sa barangay ug kapulisan.
Nasikop ang usa sa mga suspetsado, na giila nga si Joeven Bukalaw, 28 anyos, minyo ug buros ang asawa. Wala pa kini nagpadayag sa kapulisan sa iyang gibuhat apan gunit na kini sa Lantapan Municipal Station. Karung adlaw si Joeven Bukalaw mag atubang kani sa kasong Murder arun makab ot ang hustisya nga gitinguha sa pamilya.
Nagpadayon ang imbestigasyon aron masakpan ang uban pang nalambigit sa brutal nga insidente.