Giaprobahan na ang ₱6.4 bilyon nga pondo sa Bukidnon para sa tuig 2026, human sa hugot nga pag-uyon sa konseho aron matubag ang nag-unang serbisyo ug palambuon ang panginabuhi sa mga katawhan sa probinsya.Sa pakighinabi sa Bombo Radyo Malaybalay, gipadayag ni Board Member Atty. Hollis Monsanto sa Committee on Appropriations nga ang maong budget kay subay sa National Tax Allocations, diin adunay bahin ang matag LGU gikan sa nakolektang buhis sa nasod.
Gipasabot usab nga ang pondo para sa 2026 kay nakasentro sa mga programa nga gilatid sa Annual Investment Program (AIP), nga kinahanglan unang maaprobahan sa dili pa pormal nga ipasar ang tibuok budget sa tuig.
Lakip sa mga prayoridad sa maong pondo ang basic health services, ug usa sa pinakadakong programa mao ang Coffee Road Map, nga tumong nga ipasiugda ang industriya sa kape sa Bukidnon ug suportahan ang mga mag-uuma sa pagpalambo sa ilang umahan sa kape.
Sa dihang gipangutana si Board Member Atty. Hollis Monsanto sa Committee on Appropriations kabahin sa intelligence fund, nagdumili kini sa paghatag og detalye, nga giingong wala silay klaro nga kasayuran kung unsa ug pila gayud ang pondo.
Gilauman sa konseho nga pinaagi sa maong pondo, mas mapaayo pa ang serbisyo ug mas mapalambo ang ekonomiya sa probinsya sa umaabot nga tuig.