Mukabat sa P265,350 nga kantidad sa marijuana ang nakumpiska ug gipang-ibot sa kapulisan atol sa gipahigayon nga anti-illegal drugs operation sa Purok 9, Barangay Poblacion, Impasugong, Bukidnon.
Atol sa operasyon, naila ang duha ka indibiwal nga nagpaluyo sa maong pagpananom sa marijuana nga sila si alyas “Danilo,” 40 anyos, ug alyas “Dodo,” 32 anyos, apan ang duha kasamtangan pa nga gipangita sa kapulisan.
Narekober sa operasyon ang 122 ka dagkong punoan sa marijuana, usa ka bugkos sa uga nga dahon sa marijuana nga mitimbang og 2,000 grams, 35 ka marijuana seedlings, usa ka sudlanan nga adunay marijuana seeds nga mitimbang og 10 grams, usa ka improvised air gun, ug usa ka water container.
Gibanabanang ang kinatibuk-ang kantidad sa tanang nakumpiska anaa sa P265,350.
Giandam na usab ang kaso batok sa mga suspek ubos sa paglapas sa balaod kabahin sa pagpananom o paghupot og marijuana nga gikonsiderang illegal nga droga ug ipasaka kini sa Office of the Provincial Prosecutor sa Malaybalay City.
Samtang ang tanang nakumpiskang marijuana anaa na sa kustodiya sa Impasugong Municipal Police Station alang sa hustong disposisyon, ug ang mga drug evidence gidala na sa Provincial Forensic Unit sa Malaybalay City alang sa eksaminasyon.