Nanawagan ang grupong Marcos Resign Movement nga magpailawom si Pangulong Ferdinand Marcos Jr. og hair follicle test aron matapos matud pa ang isyu nga may kalabotan niya.
Sumala ni Ret. Gen. Warlito Daos, kanhi chief of staff for public safety sa DILG, nga mao kini ang iyang nakitang paagi aron masayran sa publiko ang kamatuoran sa mga alegasyon batok sa Pangulo.
Giinsistir ni Daos nga mahimo kini nga dalan aron matapos ang kagubot ug kontrobersiya nga giatubang sa Pangulo ug mawala tanan isyu batok niya kung mapamatud-an niining dili siya drug addict.
Gipagawas sa grupo ang ilang panawagan sa Trillion Peso March nga gipahigayun niadtong Domingo, Nobyembre 30, 2025, sa EDSA People Power Monument isip protesta batok sa korapsyon.
Apil usab niini ang laing pagtigum sa grupo sa EDSA Shrine, diin ilang usab gisangyaw ang isyu sa giingong pagkalambigit sa Pangulo sa korapsyon human sa pamahayag ni kanhing Ako Bicol Party-List Representative Elizaldy “Zaldy” Co nga ang tanang P100 bilyones nga budget insertions naangkon sa Pangulo ug kang kanhing House Speaker Martin Romualdez.