Mukabat sa P1,750,075 ang kantidad sa nakumpiskang shabu sa Police Regional Office 10 kon PRO10 atol sa sunod-sunod nga anti-illegal drugs operations nga gihimo sulod sa duha kaadlaw, Nobyembre 22 hangtod 23, 2025 sa lain-laing dapit sa rehiyon.
Ang operasyon misangpot sa pagkasikop sa 26 ka indibidwal nga nalambigit sa illegal nga droga.
Usa sa nag-unang operasyon mao ang pagpatuman sa search warrant sa RPDEU 10 – Team Iligan niadtong Nobyembre 22, alas 1:40 sa kaadlawon, batok kang alias “Jayme,” 50 anyos, minyo, drayber, ug lumulupyo sa Brgy. Santiago, Dakbayan sa Iligan.
Nakumpiska sa balay sa dinakpan ang duha ka pakete sa gituohang shabu nga mitimbang og 60 gramos ug gibanabanang nagkantidad og P408,000, lakip ang lain pang drug paraphernalia.
Samtang, sa laing operasyon nasikop ang mag-uyab nga sila si alias “Cogs,” 28 anyos, negosyante, ug lumulupyo sa West Poblacion, Bukidnon; ug si “Kara,” 28 anyos, mag-uuma ug residente sa Kalilangan, Bukidnon.
Nakumpiska sa buy-bust operation ang lima ka pakete sa gituohang shabu nga mitimbang og 128 gramos ug adunay kapin P871,624 nga kantidad, ug P1,000 nga gigamit isip buy-bust money, ug lain-laing drug paraphernalia.
Anaa na sa kustodiya sa Kalilangan Municipal Police Station ang duha samtang naghulat sa pormal nga disposisyon sa kaso.
Gawas niini, laing mga operasyon sa nagkadaiyang unit sa kapulisan sa rehiyon ang misangpot sa dugang pang mga pagdakop sa mga indibidwal nga nagpayuhot sa illegal nga droga, diin sa kinatibuk-an adunay 26 ka arrested persons atol sa duha ka adlawng operasyon kon weekend operations.