Nagpahayag si June Mar Fajardo nga basin mohunong na siya sa pagdula para sa Gilas Pilipinas. Matod sa 35-anyos nga PBA star, panahon na aron ang mga mas batan-on nga manlalaro ang modala sa bandera sa Pilipinas sa mga internasyonal nga kompetisyon.
Gipanghinganlan niya si Quentin Millora-Brown, nga makiguban usab kaniya sa umaabot nga FIBA Basketball World Cup Asian Qualifiers, ingon man sila Kai Sotto, AJ Edu, Kevin Quiambao, Dwight Ramos, ug Carl Tamayo nga mga batan-ong sakop sa Gilas Pilipinas.
Gipasabot ni Fajardo nga importante nga mabansay na karon ang mga batan-on ug mas taas nga mandudula aron magpadayon ang kalig-on ug dominasyon sa Gilas sa bisan unsang basketball game sa gawas sa nasud.
Sa Nobyembre 28, mobiyahe ang Gilas paingon sa Guam alang sa first window sa FIBA World Cup Asian Qualifiers, diin sa Disyembre 1 pagahimuon ang ilang duwa batok sa Guam.