Giklaro sa Lantapan Municipal Police Station nga adunay mental health issues ang maestrong mipuspus sa iyang kaubanan nga magtutudlo gamit ang stand fan sulod mismo sa opisina sa Balila Elementary School, Barangay Balila, lungsod sa Lantapan.
Giila ang biktima nga si Rasel D. Molina, Officer-in-Charge ug Teacher III sa maong tunghaan, samtang ang suspek mao si alyas “John”, usa usab ka magtutudlo.
Sa eksklusibong pakighinabi sa Bombo Radyo Malaybalay kang Police Captain Sheila Joy Jangad, tigpamaba sa Lantapan Municipal Police Station, gibutyag niini nga mismo ang inahan sa suspek ang unang nanawag sa estasyon aron mangayo og police assistance.
Matud ni Police Captain Jangad, gipadlock sa pamilya ang kwarto sa suspect gumikan gikaingong nitukar na usab ang sakit sa suspek, nga kaniadto matud pa narehabilitate na ug kasamtangang aduna nay maintenance medication.
Apan, sa pag-abot sa kapulisan, nakaikyas na ang suspek sa ilang panimalay, ug misutoy padulong sa eskwelahan.
Pagsulod sa tunghaan, nilog-in matud pa ang suspek sa biometric attendance system apan wala mabasa ang pag-log niini.
Nunot niini, misulat kini sa logbook og dili maayong mga pulong, ug nanghasi sa sulod sa opisina.
Didto, gikuha niini ang stand fan ug gipuspus kini sa ulo sa biktima nga nagresulta sa grabeng samad.
Dugang pa sa imbestigasyon, wala na gipaduty ang maong magtutudlo sa mga maong adlaw tungod nabantayan sa pamilya ang pagtukar sa sakit.
Sa kasamtangan padayon pa ang imbestigasyon sa kapulisan aron masuta kung adunay kalambigitan ang suspek sa paggamit sa illegal nga droga ug uban pang kalambigitan, samtang gihulat pa usab ang desisyon sa pamilya sa biktima kabahin sa pagpasaka og kaso batok sa suspek.
Kahinumdoman nga nahitabo ang maong insedente pasado alas 9:30 sa buntag kagahapong adlawa, Nobyembre 12, 2025.