Usa na usab ka makasaysayan nga kalampusan ang natala sa Filipina tennis sensation nga si Alex Eala human siyang makaabot sa Top 50 sa Women’s Tennis Association (WTA) rankings diin siya ang una nga Pilipina nga nakaabot niining lebel sa kasaysayan sa tennis.
Si Eala misaka sa No. 48 sa pinakabag-ong WTA rankings human sa iyang impresibong performance sa mga international tournaments niadtong Oktubre.
Ang iyang pagsaka mao’y bunga sa iyang consistent nga performance sa mga singles events, lakip na ang iyang kadaugan sa WTA 100 ug uban pang high-level nga kompetisyon.
Si Eala, 20 anyos, produkto sa Rafael Nadal Academy sa Spain, ug dugay na siyang naila nga usa sa mga rising stars sa Asian tennis.
Gawas sa iyang mga kalampusan sa junior Grand Slam, padayon siyang nagpakita sa iyang kahanas ug talento sa professional circuit.
Kini nga milestone dili lang personal nga kalampusan alang kang Eala, apan usa usab ka inspirasyon sa mga kabatan-onang Pilipino nga gusto mosulod sa international sports.
Sumala sa mga sports analysts, ang pagkahimong kabahin sa Top 50 maghatag og daghang oportunidad para kaniya aron makasalmot sa mga major tournaments sama sa Australian Open, French Open, Wimbledon, ug US Open.