Gipahibalo ni Ombudsman Jesus Crispin “Boying” Remulla nga magmugna ang iyang buhatan og task force aron tutukan ang kalambigitan sa pamilya Villar sa kontrobersyal nga flood control projects anomaly.
Matod ni Ombudsman Remulla, kini nga grupo mohimo og imbestigasyon aron masuta kung adunay kalabutan o nalambigit si kaniadtong DPWH Secretary ug karon Senador Mark Villar sa maong isyu.
Giklaro niini nga ang katuyoan sa maong task force mao ang pagsusi sa mga proyekto sa river drive ug flood control nga nahimutang sa Las Piñas ug Bacoor, Cavite diin giingon nga ang mga Villar ang tag-iya sa yuta nga gitukoran sa proyekto.
Tumong niini nga matino kung nakapahimulos ba ang pamilya Villar sa maong mga proyekto.
Samtang, sumala ni Independent Commission for Infrastructure (ICI) member Rogelio “Babes” Singson, dugay na nga isyu ang korapsyon sa flood control projects ug dili lang kini nagsugod sa duha ka tuig ang milabay.
Matud pa ni Singson, gikan pa sa 2016 hangtod 2025, adunay ₱1.7 trilyon nga gigahin alang sa flood control.
Apan base sa master plan para sa 18 ka major rivers, ₱800 hangtod ₱900 bilyon ra unta ang kinahanglan kung husto lang ang implementasyon.
Tungod niini, posibleng dili makalikay nga manubag si Senador Mark Villar, gumikan nagsugod ang pagtaas sa mga proyekto sa flood control sa panahon sa administrasyong Duterte, diin siya ang kalihim sa DPWH.
Gipasabot usab ni Ombudsman Remulla nga kinahanglan gayud ang pagmugna og espesyal nga grupo aron mahatagan ug pokus ang imbestigasyon batok sa pamilya Villar.
Dugang pa niini, nga ang kadak-on sa proyekto nga naglangkob sa Las Piñas, Bacoor, Cavite hangtod Muntinlupa kay mabot sa bilyon-bilyon ang kantidad.
Bisan pa sa kadaghan sa mga kasong gina-atubang sa buhatan, gipasalig ni Remulla nga adunay igo nga mga abogado ug kawani ang Ombudsman aron matutukan ang imbestigasyon ug mahatagan ug hustong resulta ang mga kaso nga may kalambigitan sa anomalya.