Nasakmit sa kapulisan ang kapin P1.1 milyon nga kantidad sa iligal nga droga sa Kalilangan, Bukidnon, nga misangpot sa pagkasikop sa duha ka high-value individuals, sulod sa usa ka operasyon batok sa iligal nga droga nga gipahigayon niadtong milabayng adlaw, Nobyembre 4, 2025. Gipahigayon sa Kalilangan Municipal Police Station (MPS) ang maong operasyon sa Purok 1, Barangay Central Poblacion, Kalilangan, Bukidnon.
Nasikop ang duha ka lalaki nga 24 ug 20 anyos nga giila sa awtoridad nga mga high-value targets sa anti-illegal drugs watchlist. Nakuha sa mga otoridad ang tulo ka pakete nga adunay puti nga kristal nga substansiya nga gituohang shabu nga adunay total nga gibug-aton nga 163.5 grams, ug mokabat sa kapin P1,111,800.00. Apil usab sa nakumpiska ang P1,000 bill, duha ka cellphone, ug usa ka Yamaha NMAX nga motorsiklo nga gigamit sa operasyon.
Gipangandaman na karon ang kaso batok sa mga suspetsado ubos sa Section 5 ug 11, Article II sa Republic Act 9165 o Comprehensive Dangerous Drugs Act of 2002. Padayon usab ang kapulisan sa pagpangita sa mga posible pang konektado sa maong operasyon aron mapugngan ang pagpalapad sa iligal nga droga sa probinsya sa Bukidnon.