Aron matabangan nga makabangon gikan sa trahedya, gihatagan sa Department of Labor and Employment (DOLE) Bukidnon Provincial Office og kapital nga nagkantidad og ₱50,000 ang pamilya Ubatay sa seremonya nga gipahigayon niadtong Oktubre 30, 2025 sa Barangay Palacapao, Quezon, Bukidnon.
Ang maong pinansyal nga tabang gihatag alang sa mga anak ug apo nila Ely ug Thelma Ubatay aron mapadayon ang ilang panginabuhian ug maipadayag ang padayon nga suporta sa ahensya sa mga apektadong pamilya.
Ang magtiayong Ely ug Thelma Ubatay, nga dugay nang nagabaligya og utan, maoy nahanaw sa landslide nga nahitabo sa Overview, Palacapao niadtong Oktubre 18, 2025.
Human sa lima ka adlaw nga pagpangita, narecover ang ilang mga lawas niadtong Oktubre 23, 2025. Gisiguro sa DOLE Bukidnon nga magpadayon ang ilang livelihood assistance program aron matabangan ang mga pamilya nga naapektuhan sa kalamidad nga makasugod pag-usab sa ilang panginabuhian.