Gipahayag sa Department of Justice (DOJ) nga magpadayon gihapon ang imbestigasyon sa gobyerno bahin sa mga iregularidad sa flood control projects bisan pa wala’y partisipasyon gikan sa magtiayong kontraktor nga sila Pacifico “Curlee” ug Sarah Discaya.
Sumala ni Prosecutor General Richard Anthony Fadullon, dili sila magsalig sa testimonyo sa mga Discaya. “Magpadayon kami sa imbestigasyon bisan unsay ilang desisyon o dili nila pag-apil,” matod niini.
Nahibaw-an nga miatras ang magtiayon sa pakigkooperar sa Independent Commission for Infrastructure (ICI) nga nag-imbestiga sa maong kontrobersya. Matod ni ICI Executive Director Brian Hosaka, miatras ang magtiayon pagkahuman nila makita sa usa ka interview nga wala pay nakapasar aron mahimong state witness, sumala ni Commissioner Rogelio Singson.