Mibiyahe si Presidente Ferdinand Marcos Jr. paingon sa South Korea karong adlawa aron motambong sa ika-32 Asia-Pacific Economic Cooperation (APEC) Economic Leaders’ Meeting sa Gyeongju, human sa iyang partisipasyon sa 47th ASEAN Summit sa Malaysia.
Magpabilin ang pangulo sa South Korea hangtod Nobyembre 2, subay sa imbitasyon ni South Korean President Lee Jae Myung. Kauban niya ang mga lider ug representante sa 21 ka nasud nga sakop sa APEC. Sumala sa DFA Assistant Secretary Angelica Escalona, motambong si Marcos sa Leaders’ Meeting, Dialogue uban sa APEC Business Advisory Council, ug sa CEO Summit.
Sa kiliran sa maong kalihokan, makigpulong usab ang pangulo sa pipila ka negosyante ug business executives. Maghimo usab siya og wreath-laying ug tree planting ceremony sa UN Memorial Cemetery sa Busan aron sa pagpasidungog sa 7,420 ka Pilipinong sundalo nga nakig-away sa Korean War, ug makigkita sa Filipino community na anaa didto.
Matod sa DFA, adunay kapin 70,000 ka Pilipino sa South Korea, diin 42,000 niini mga OFW nga nagtrabaho sa agrikultura, entertainment, pagpangisda, ug household sector.