Gilauman ni Ombudsman Jesus Crispin Remulla nga mapasaka na sa Sandiganbayan sa dili molapas sa Nobyembre 25, 2025, ang unang batch sa mga kaso batok sa nalambigit sa flood control scandal. Kini human isumite sa Independent Commission for Infrastructure (ICI) ang temporaryo nga report nga nagrekomendar nga pasakaan og kaso sila Senador Joel Villanueva, Jinggoy Estrada, kanhi Ako Bicol Rep. Elizaldy Co, ug ubang personalidad.
Matod ni Remulla, tanan nga kaso nga may kalabotan sa mga benepisyaryo sa maong iskandalo apil na sa ihap nga ipaabot nga ipasaka sa anti-graft court, lakip na ang mga kaso nga gisusi sa Department of Justice (DOJ). Wala niini gibuyag ang tukion nga mga kaso, apan iyang giingon nga nalubong sa trabaho ang ilang opisina sa mosunod nga mga bulan ug tuig.
Sa pagkakaron, adunay 13 ka kaso nga anaa pa sa preliminary investigation ug lima ka kaso nga nagpadayon pa sa fact-finding. Gilauman ni Remulla nga mopasaka sila og kaso batok sa 14 hangtod 15 ka indibidwal, lakip na ang mga opisyal sa publiko ug mga board of directors sa kompanya nga nalambigit.
Matod pa niini, mas gipili nilang ipasaka ang mga kaso nga sayon mapamatud-an sama sa direct ug indirect bribery, malversation, falsification, ug uban pang kaso nga may kalabotan sa korapsyon kaysa plunder nga lisod patun-an sa korte.