Nagpasaka si kanhing Senador Antonio Trillanes IV og reklamong “plunder” batok kang kanhi Presidente Rodrigo Roa Duterte ug Senador Bong Go sa Office of the Ombudsman karong adlawa.
Gipuntirya sa reklamo ang allegasyon nga pag-award sa mga proyekto ngadto sa usa ka kumpanya nga gipanag-iya matud pa sa amahan ni Go.
Ang mga kasong paglapas sa Plunder Law, Anti-Graft and Corrupt Practices Act, ug Code of Conduct for Public Officials gisang-at ni Trillanes batok sa duha ka opisyal.
Walay pag-atubili usab nga gipahayag ni Trillianes ang pagtumbok nga “main plunderer” sa maong reklamong iyang gisang-at sa Office of the Ombudsman si Senador Bong Go.
Matud niini, si Go ang central figure likod sa iyang amahan ug igsoon nga gipanag-iyahan ang CLTG Builders, diin nakakuha og kapin ₱7 bilyon nga kantidad sa mga proyekto sa imprastraktura.
Dugang pa ni Trillanes, ang posisyon ni Sen. Bong Go, ilabi na sa panahon sa kaniadtong administrasyong Duterte, maoy naghimo og dalan aron mahatagan og kontrata ang mga proyekto nga nagkantidad og bilyon-bilyon.