Nahugno sa usa ka landslide ang bahin sa Bukidnon–Davao Road sa Sitio Kipolot, Barangay Palacapao, lungsod sa Quezon, Bukidnon pasado alas-9:40 sa gabii, Oktubre 18, 2025, hinungdan nga dili na madaanan ang dalan sa tanang matang sa sakyanan.
Sumala sa Municipal Public Safety Office (MPSO) sa Quezon, gideklarang “not passable” ang maong bahin sa karsada aron malikayan ang posibleng disgrasya. Sa kasamtangan, anaay mga personahe gikan sa MPSO, Municipal Disaster Risk Reduction and Management Office (MDRRMO), Municipal Engineering Office (MEO), ug Bureau of Fire Protection (BFP) nga nagpadayon sa assessment, clearing, ug rescue operations sa lugar.
Girekomenda sa mga otoridad nga gamiton sa mga motorista ang Puntian–Arakan Road isip alternatibong agianan samtang padayon pa ang pagkasirado sa maong dalan. Sumala sa Public Information Office sa Quezon LGU, gitun-an usab ang laing mga diversion route sama sa Puntian–Arakan–Marilog–Valencia–San Fernando–Tagum network aron matabangan ang mga biyahe padulong Davao.
Matud pa sa mga otoridad, gipangbutangan na og mga warning signage sa dapit ug gimonitor pag-ayo ang kahimtang sa kalsada. Nahitabo ang landslide pipila lang ka minutos human sa magnitude 5.5 nga linog sa Surigao del Sur pasado alas-8:31 sa gabii, nga gibati usab sa pipila ka bahin sa Mindanao lakip ang Bukidnon.
Sumala sa Phivolcs, ang linog adunay kalalumon nga 20 kilometro ug gitawag nga aftershock sa magnitude 6.0 nga linog nga nahitabo niadtong Oktubre 11 sa samang dapit.