Gipahamtangan sa Department of Social Welfare and Development kon DSWD ang suspensyon batok sa Bukidnon Multi-Sectoral Services Foundation, Inc. (BUMSSEFI) nga nahimutang sa Maramag, Bukidnon, gumikan wala kini lisensya isip usa ka Social Welfare and Development Agency (SWDA).
Subway sa mando kinahnaglan nga ipahunong sa BUMSSEFI ang tanang kalihokan kalabot sa social welfare ug development sama sa outreach programs, public solicitation, ug partnership engagements hangtod nga makakompleto kini sa mga rekisito sa rehistro ug lisensya sa operasyon.
Nasuta sa monitoring visit nga gihimo sa DSWD Field Office X, nga nagpadayon kini sa paghatag og serbisyo bisan wala pa makakuha sa Certificate of Registration and License to Operate (CRLTO) ug gipapuyo matud pa ang mga residente sa delikadong kondisyon.
Bisan pa sa teknikal nga tabang nga gihatag ug sa mando nga dili una magdawat og kliyente samtang nagproseso sa aplikasyon, padayon gihapon kini nga midawat og bag-ong kliyente, hinungdan sa pag-isyu sa suspension order.
Gihatagan kini og 30 ka adlaw aron makasunod sa mga gikinahanglan samtang ang mga kliyente niini gipasa na sa mga centers ug residential care facilities sa DSWD-10 sa Manolo Fortich, Bukidnon.
Subay sa Republic Act No. 4373 nga giamendaran sa Republic Act No. 10847, kinahanglan nga ang tanang entidad nga nagatanyag og social welfare ug development services makakuha una og rehistro ug lisensya gikan sa DSWD aron masiguro ang pagsunod sa sumbanan ug proteksyon sa mga benepisyaryo, ug padayon ang DSWD sa pagpangusog nga mapadayon ang integridad, responsibilidad, ug kalidad sa serbisyo sa tanang Social Welfare and Development Agencies (SWDAs) sa tibuok Northern Mindanao.