Tulo ka mga suspetsado ang nasikop human mapuhag sa mga otoridad ang usa ka drug den sa Purok 7, Barangay Simaya, Malaybalay City Bukidnon, pasado alas 7:25 sa gabii, Oktubre 10, 2025. Gipangulohan sa mga operatiba ang drug buy-bust operation nga miresulta sa pagka-aresto nila alyas “Marie” (37 anyos), “Jun-Jun” (19 anyos), ug “Juan” (18 anyos), samtang nakadagan si alyas “Pedro” (38 anyos), nga giingong tag-iya o maintainer sa maong drug den.
Narekober sa lugar ang gituohang shabu nga mutimbang sa 6 gramos nga nagkantidad og ₱40,800, 0.9 na gramos nga marijuana nga nagkantidad sa ₱100, mga drug paraphernalia, ug buy-bust money. Sa laing operason usab Nakumpiska ang P177,820 nga kantidad sa gitouhang illegal nga droga atol sa gihimong buy-bust operation sa Barangay Barandias, Pangantucan, Bukidnon. Nasikop atol sa maong operasyon ang usa ka lalaki nga giilang si alias “Dodong”, 25 anyos.
Nakumpiska atol sa operasyon ang usa ka pakete sa gitouhang shabu nga adunay gibug-aton nga 0.15 gramos ug gibanabana nga nagkantidad sa P1,020, ug laing lima ka pakete sa gitouhang shabu nga adunay gibug-aton nga 26 gramos nga nagkantidad og P176,800. Diin ang kinatibuk-ang gibug-aton sa nakumpiskang droga miabot sa 26.15 gramos nga adunay standard drug price nga P177,820.
Samtang sa laing bahin sa Malaybalay, nasikop usab ang usa ka lalaki human makit-an nga adunay marijuana nga gitago sa sulod sa pakete sa Pansit Canton atol sa checkpoint sa Barangay Sumpong. Ang suspetsado nga giilang si alyas “Michael” nasikop pasado alas 8:20 sa buntag, Oktubre 11, 2025, sa Purok 4 sa maong barangay atol sa routine inspection nga gihimo sa kapulisan. Sa pagkakaron, anaa na ang mga dinakpan sa tagsa tagsa ka kustodiya sa mga awtoridad alang sa tukmang disposasyon.