Magpadayon ang Filipina tennis star nga si Alexandra “Alex” Eala sa tulo ka sunod-sunod nga WTA 250 tournaments sa Asia nga magsugod sa sunod semana.
Human sa iyang pagsalmot sa US Open, nakab-ot ni Eala ang maayong mga resulta sa tulo ka WTA 125 events diin midaog siya sa Guadalajara 125, nakaabot sa semifinals sa Jingshan Tennis Open, ug quarterfinals sa Suzhou.
Nakadula usab siya sa WTA 250 SP Open sa Brazil, diin nakaabot siya hangtod sa quarterfinals.
Bisan pa man napilde siya sa qualifiers sa Wuhan Open (WTA 1000), padayon gihapon ang determinasyon sa 20-anyos nga si Eala, nga ranked No. 54 sa kalibutan, aron makabawi samtang hapit na matapos ang WTA season.
Una kining makigsangka sa Japan Women’s Open, diin makontra niini ang mga bantog nga players sama nila Naomi Osaka, Leylah Fernandez, ug Cristina Bucsa diin nga nakapildi kaniya sa US Open.
Sunod niini, mosalmot siya sa Guangzhou Open (Oktubre 20–26), ug pagkahuman niini, mobyahe siya sa Hong Kong Tennis Open (Oktubre 27–Nobyembre 2), diin posible niyang makaatubang pag-usab ang iyang mga kanhing nakontra sama nila Emma Raducanu, Clara Tauson, ug ubang mga top players.