Gibatikos sa usa ka senador ang kakulang sa pagpakabana sa kontrobersyal nga flood control scandal diin pipila na ka bulan nga nabutyag sa publiko.
Matud ni senador Allan Peter Cayetano, gipadayag niini ang kabalaka diin hinungdan sa walay klarong imbestigasyon mao ang walay klarong aksyon gikan sa mga ahensiyang responsable aron mapanubag ug silotan ang mga opisyal nga nalambigit sa gikaingong anomaliya sa mga proyekto.
Dismayadong gisaysay niini nga sayang lamang ang kuwarta sa katawhan kung magpadayon ang ingon niini nga klase sa korapsyon diin hangtod karon wala pa gihapon napasakaan og kaso ang mga personahe nga nagpaluyo sa dakong pagpanglimbong.
Nanawagan ang senador sa administrasyon nga seryosohon ang imbestigasyon ug ipakita sa publiko nga walay gipili ang balaod, ilabi na kung bahin sa paggamit sa pondo alang sa mga proyekto sa imprastruktura sa nasud ug aron mahibalik ang pagsalig sa katawhan.
Dugang pa niini, hingpit nga gipaambit niini nga dili igo alang kaniya ang mga lakang sa gobyerno batok sa isyu.
Matud pa sa senador nga dili siya kontento sa imbestigasyon sa Blue Ribbon Committee tubgod gangtud karon wala pay nanubag bisan isa sa mga nahitabong korapsyon sa nasud.
Nagpabilin usab ang iyang paglaom nga masulbad kini ug gihingusgan nga kinahanglan madayon ang imbestigasyon sa komitiba nga walay gidapigan samtang nagsubay sa balaod.