Haom ang pag-uyon sa Estados Unidos nga makapalit na sa bag-ong F-16 fighter jet ang Pilipinas aron mapalig-on pa ang kapas sa Armed Forces of the Philippines alang sa pag-depensa kaugalingong tugkaran niini batok sa external forces.
Kini ang pagpasabot ni Philippine Army spokesperson Col. Louie Dema-ala batok sa mga pagsaway kung nganong gihataga’g pagtagad sa Pilipinas nga makapalit sa 20 US-made F-16 fighter jets nga adunay kantidad nga 5.5 bilyones dolyares nga magamit nga pondo.
Gibutyag ni Dema-ala nga dili kini angayang hataga’g dautan nga kahulugan kay higayon hinoon nga makahupot na sa de kalidad nga kagamitang-panggiyera gikan sa pinakagamhanang nasud sa kalibutan ang Pilipinas.
Una niini,migawas ang pag-uyon sa Amerika nga makapalit na ang Pilipinas sa maong mga eroplano usa ka semana ang nakalabay gikan pagduaw ni US Defense Secretary Pete Jegseth sa Pilipinas aron pakigkitaan si Pangulong Ferdinand Marcos Jr. sa Malakanyang ug ubang top Philippine Army officials.
Hisayrang tipik sa pag-uyon sa Estados Unidos nga baligyaan ang Pilipinas sa ilang war planes kay aron mapugngan ang dugang panghasi sa China sulod sa West Philippine Sea.