Gibutyag sa kapulisan sa Bukidnon nga aduna nay person of interest sa natigayong pagpamusil patay sa duha ka lalaki sa Purok 7, Barangay Vintar, Valencia City, ning lalawigan.
Sa pakighinabi sa Bombo Radyo Malaybalay kang PMaj. Jayvee Bababan, tigpamaba sa Bukidnon Provincial Police Office, nga aduna nay gitutokan nga responsable sa pagpamusil patay sa duha ka biktima apan nangalap pa og dugang ebidensya aron hingpit kining mapamatud-an.
Kahinumdoman nga kagahapon adlawa sa alas 11:40 sa buntag nahitabo ang pagpamusil patay sa giilang biktima nga sila si Godofredo Jardinico, 47 anyos ug Irinisio Pasquin, 45 anyos, pulos residente sa maong syudad.
Samtang gabyahe padulong sa lungsod sa San Fernando kalit lamang gipusil sa wala mailhing suspek diin nakaangkon kini og mga samad pinusilan sa nagkadaiyang parte sa lawas nga miresulta sa kamatayon.
Gibutyag usab ni PMaj. Babaan, nga kaniadtong Enero 10 ning kasamtangang tuig, una nang gisulayan og pusil sa wala mailhing suspek si Godofredo apan nakarekober kini.
Samtang si Irinisio Pasquin, nadamay lamang matud pa sa maong insidente.
Sa pagkakaron padayon nga nangalap og ebidensiya ang kapulisan diin daghang anggulo ang gitutokan gumikan adunay rekord si Jardinico sa land conflict, pagkalambigit sa illegal nga droga, rekord sa barangay ug posibleng panagbangi sa iyang kaparyentihan.