Sa unang higayon sulod sa 124 ka tuig, lima ka kasamtangang mahistrado sa Korte Suprema ang mibisita sa lalawigan sa Sulu aron pormal nga ilunsad ang konstruksyon sa bag-ong Hall of Justice sa maong probinsya.
Gipangulohan ni Chief Justice Alexander Gesmundo ang delegasyon sa Korte Suprema, uban si Senior Associate Justice Marvic Leonen ug Associate Justices Jhosep Lopez, Japar Dimaampao, ug Jose Midas Marquez.Mainiton silang gidawat nila Sulu Governor Abdusakur Tan II, Vice Governor Abdusakur Tan, 1st District Representative Samier Tan, ug Kusug Tausug Party-list Representative Aiman Tan, nga mapasalamaton sa makasaysayang pagbisita sa mga mahistrado.
Matod sa mga lokal nga opisyal, ang maong kalihokan naghatag og paglaum sa mga lumulupyo sa Sulu ilabina sa mga kabataan nga ang hustisya anaa sa ilang abot bisan pa sa gilay-on sa ilang lugar.Matud pa ni Chief Justice Gesmundo nga ang pagtukod sa Hall of Justice dili lang kay usa ka estruktura, kundili usa ka simbolo sa mas lig-on, patas, ug kasaligan nga kaugmaon. usa ka lugar diin ang mga panagbangi sulbaron pinaagi sa balaod, dili pinaagi sa panagbangi o kasamok.
Uban sa delegasyon ang Presidential Adviser on Peace, Reconciliation and Unity nga si Secretary Carlito Galvez Jr., nga misakay uban sa mga mahistrado gikan sa Zamboanga padulong sa Sulu sakay sa duha ka Black Hawk helicopters.Ang bag-ong Hall of Justice tukoron sulod sa Sulu Provincial Capitol Grounds sa Patikul, Sulu. Adunay modernong disenyo, nga adunay glass structure ug neoclassical facade.