Malampusong nakapahigayon ang Department of Labor and Employment (DOLE) sa pagpamaligya sa bugas nga tag P20 kada kilo ngadto sa mga minimum wage earners dinhi sa lalawigan sa Bukidnon.
Sa eksklusibong pakighinabi sa Bombo Radyo Malaybalay kay Ruben Biado,Labor and Employment Officer sa Dole Bukidnon Provincial Field Office nga kini nga inisyatiba kabahin sa paningkamot sa DOLE nga matabangan ang mga mamumuo nga maatubang ang nagkataas nga presyo sa palaliton.
Matud pa ni Biado, maka-benepisyo sa tag-P20 nga bugas ang mga trabahanteng nagasweldo og minimum wage, apan gikinahanglan nga ang ilang mga kumpanya mismo ang magpadala og request ngadto sa ilang buhatan. Kini aron ma-validate ang listahan sa benepisyaryo ug aron makapangandam og igo nga pondo ang ahensya.Gipasabot usab nga adunay mga pribadong kumpanya nga naka-avail na sa maong programa ug kasamtangang nagpahimulos sa benepisyo niining rice subsidy.
Dugang pa ni Biado nga padayon ang ilang paningkamot sa pag-apod-apod sa ayuda aron mapagaan ang panginabuhi sa mga ordinaryong mamumuo, ilabi na sa private sector. Ang maong programa kabahin sa mga inisyatiba sa national government aron masuportahan ang mga Pilipinong trabahante sa panahon sa kalisod.