Mipagula ang Department of Education (DepEd) og Department Order 22 nga naglatid sa mandatoryong pagbalik sa mga sports club sa tanang pampublikong tulonghaan.
Matud sa ahensya, nga kini kabahin sa pagtuman sa saad ni Presidente Ferdinand Marcos Jr. atol sa ika-upat nga State of the Nation Address (SONA).
Matud ni Education Secretary Sonny Angara, nga ang mando naghatag og patakaran ug giya sa pagtukod, ug pagdumala sa mga school sports club, lakip na ang paghatag og benepisyo ug pasidungog, gigikanan sa pondo, ug pagmonitor sa operasyon niini.
Lakip usab sa programa ang Sports Supplies and Equipment Enhancement and Distribution Program aron masuportahan ang kalihokan sa isports sa matag tulonghaan.
Ubos sa kamandoan sa DepEd, ang mga school heads gitahasan sa pagpatuman sa school-level policy partikular sa pagpahigayon sa school sports club activities, aron mapugngan ug matubag ang bullying, ug midugang nga ang tanang sports club activities kinahanglang makapugong sa child abuse ug uban pang matang sa pagpang-abuso ug pagpangdaog-daog batok sa mga bata.
Dugang pa niini, nga ang matag eskwelahan adunay usa lamang ka school sports club, diin adunay arnis isip mandatory nga sport, ug mahimong magtanyag ug dugang nga mga dula base sa mosunod: athletics o swimming isip basic sports, sports nga gidula sa Palarong Pambansa, Philippine games, learners’ preferred sports as per survey results ug sports ubos sa existing sports associations.