Napakyas ang Gilas Pilipnas sa ilang unang dula sa 2025 FIBA Asia Cup batok sa Chinese Taipei, sa score nga 95-87.
Gidominar sa Chinese Taipei ang dula diin sa sinugdanan pa lamang wala na kini motugot nga makalabaw ang national basketball team sa nasud sa maong torneyo nga gipahigayon sa Jeddah, Saudi Arabia.
Nahimong hagit alang sa Gilas ang sayong foul trouble ni naturalized player Justin Brownlee, diin na-foul out kini sa unang bahin sa kataposang quarter.
Misuway ang Gilas Pilipinas nga makabawi, apan lig-on ang depensa ug opensa sa Chinese Taipei.
Kini maoy ikaduhang kapildihan sa Gilas batok sa Chinese Taipei, diin ang una niini kaniadtong Pebrero.
Nahimong bida sa dula si Ying-Chun Chen sa Chinese Taipei, human kini mikuha sa iskor nga 34 puntos.
Sunod nga makigsangka ang Gilas sa New Zealand ug Iraq alang sa Group D sa maong torneyo.