Nadismaya ang sektor sa mamumuo sa ika-upat nga State of the Nation Address (SONA) ni Presidente Ferdinand Marcos Jr. tungod sa kakulang sa paghisgot sa mga isyu nga may kalabotan sa mga mamumuo.
Sa eksklusibong pakighinabi sa Bombo Radyo Malaybalay, gipadayag ni Labor Relations Consultant Nick Borja ang iyang kasubo, labi na sa wala’y panaghisgut sa gisugyot nga P200, dugang sweldo, nga hangtod karon wala pa gihapon mapasa nga balaod. Matod ni Borja, importante nga makadawat og hustisya ug igo nga suweldo ang mga trabahante, ilabi na karon nga nagasaka ang presyo sa mga palaliton.
Tungod niini, iyang gihatagan og grado nga 5 out of 10 ang SONA sa Presidente. Naglaum usab si Borja nga sa Ika-20 nga Kongreso, adunay mga mambabalaod nga mosuporta sa mga panukalang balaod nga mopadugang og benepisyo para sa mga mamumuo.