Gihagit sa National Bureau of Investigation (NBI) ang kampo ni Vice President Sara Duterte nga mosang-at og pormal nga reklamo aron maimbestigahan ang alegasyon sa pagpanghulga ug pagpugos sa usa ka kanhing household staff niini nga mopirma sa dokumento.
Kini human ipadayag ni Atty. Paolo Panelo, usa sa mga tigpamaba sa bise presidente, nga nakadawat sila og mensahe gikan sa kanhing staff nga nangayo og tabang tungod sa giingong pagpugong kaniya sa pipila ka indibidwal ug pagpanghulga sa iyang kinabuhi.
Matod ni Panelo, nadawat ang mensahe alas-11:19 sa gabii, Lunes, diin giingong gipugos ang maong indibidwal sa pagpirma sa dokumento apan mibalibad kini.
Samtang, gipasiugda ni NBI Director Melvin Matibag nga wala pa silay nadawat nga pormal nga reklamo o konkretong ebidensya nga mosuporta sa maong alegasyon, busa dili pa nila kini maimbestigahan.
Giawhag niini ang kampo ni Duterte nga moduol sa NBI, Philippine National Police o Public Attorney’s Office aron pormal nga madokumento ug masusi ang insidente.
Sa pagkakaron, wala pa mapamatud-i ang pagkatawo sa nagpadala sa mensahe ug ang kamatuoran sa mga alegasyon kalabot sa giingong pagpanghulga ug pagpugos sa kanhing staff.

