Usa ka makapakurat nga mensahe sa pagpangayo og tabang ang nadawat ni Bise Presidente Sara Duterte gikan sa kanhi niya household staff, nga nagbutyag sa usa ka seryoso nga insidente sa pagpanghadlok ug pagpugos.
Sumala ni Atty. Paolo Panelo, legal spokesperson ni VP Duterte, miabot ang maong mensahe alas 11:19 sa gabii niadtong Nobyembre 16, 2026, nga nagpahibalo nga ang kanhi empleyado anaa sa kustodiya sa pipila ka indibidwal sa Manila.
Gikataho nga gihulga ang kinabuhi sa staff ug gipugos kini sa pagpirma og usa ka dokumento nga hugot niyang gibalibaran.
Gikumpara ni Panelo ang maong panghitabo sa susamang insidente ni Jefry Tupas niadtong Setyembre 29, 2026, diin gihulga usab kini sa mga ahente sa National Bureau of Investigation (NBI) ug gitinguha nga dad-on sa Manila.
“What makes this incident particularly concerning is its striking similarity to what happened to Jefry Tupas, who was previously told by agents of the National Bureau of Investigation on September 29, 2026, that there were threats to his life and was subsequently subjected to an attempt to bring him to Manila,” pahayag sa abogado.
Sa pagkakaron, wala pa masayri ang nahimutangan ug dili pa makumpirma ang kahimtang sa kanhi household staff.
Nagpahayag og dakong kabalaka ang kampo ni Duterte nga ang maong insidente kabahin sa usa ka kampanya sa administrasyong Marcos sa paggamit sa mga institusyon sa estado, sama sa NBI, aron manghadlok ug mamugos og mga indibidwal nga mahimong bakak nga testigo batok sa Bise Presidente.
Nanawagan si Panelo sa publiko, media, ug mga hingtungdan nga institusyon nga hatagan og pagtagad ang giingong paggamit sa mga ahensya sa gobyerno alang sa politikal nga katuyoan.
“We hope to bring this to the attention of the public, the media, and individuals and institutions concerned over the unremitting efforts of the government to harass, threaten, and coerce individuals into becoming false witnesses in support of trumped-up charges against VP Sara Duterte, weaponize state agencies, and undermine the rule of law for political ends,” dugang ni Panelo.
Gihangyo usab niya ang dinalian nga pagseguro sa kaluwasan ug kagawasan sa kanhi empleyado.

