Gipasigarbo ni Department of National Defense (DND) Secretary Gilberto Teodoro Jr. ang mga dagkong kaayohan nga madala sa bag-ong Defense Cooperation Agreement tali sa Pilipinas ug Australia, dili lang sa pagpalig-on sa kapasidad sa militar kondili lakip na sa ekonomiya ug pagtubag sa kalamidad.
Gipadayag ni Teodoro nga tumong sa maong kasabutan nga wagtangon ang red tape ug paspason ang koordinasyon sa pwersang militar sa duha ka nasud ubos sa kasamtangang Status of Visiting Forces Agreement (SOVFA) alang sa hiniusang pagbansay ug pagbayloay og impormasyon.
Dugang pa sa kalihim, adunay tulo ka direktang benepisyo ang kasabutan alang sa katawhan: ang mas paspas nga pagresponde panahon sa kalamidad, ang paghatag og kompiyansa sa mga langyawng mamumuhunan pinaagi sa lig-on nga seguridad, ug ang pagpanalipod sa West Philippine Sea nga giilang yawe sa paglambo sa ekonomiya sa nasud.
Kahinumduman nga gilagdaan niadtong Domingo, Nobyembre 15, ang maong Defense Cooperation Arrangement tali nilang Teodoro ug Australian Ambassador to the Philippines Marc Innes-Brown atubangan ni Australian Prime Minister Anthony Albanese atol sa ika-49 nga ASEAN Summit sa kaulohan.

