Patay ang usa ka 36-anyos nga inahan sa tulo ka anak human giingong gidunggab sa iyang live-in partner sa sulod mismo sa ilang gipuy-an sa Cepalco Compound, Barangay Consolacion, Cagayan de Oro City, niadtongmilabay’ng adlaw.
Giila sa kapulisan ang biktima nga si Mary Grace Masong, kansang lawas nadiskobrehan sa mga silingan nga nagbuy-od ug naligo sa iyang kaugalingong dugo diin adunay daghang samad sa nagkalain-laing bahin sa lawas.
Base sa imbestigasyon sa Police Station 5 sa Puntod, miabot sa 16 ang samad nga nadawat sa biktima, nga maoy hinungdan sa iyang kamatayon.
Gikumpirma kini ni Police Captain Lorenzo Ocon, hepe sa maong estasyon. Ang suspek nga giila nga si Ronnil Khris Chua, kapuyo sa biktima, wala na sa ilang pinuy-anan sa dihang nadiskobrehan ang krimen.
Gibase sa mga imbestigador ang ilang dugang nga pagsusi sa mga pamahayag sa silingan nga kanunayng makadungog og panaglalis ug pagsinggitay gikan sa panimalay sa magtiayon.
Samtang, gipadayag sa igsoon sa biktima pinaagi sa social media ang kasakit ug kasuko sa pamilya tungod sa nahitabo. Matod niini, balik-balik na matud nga gikulata sa suspek ang iyang manghod sa wala pa ang makamatay nga insidente.
Gisaysay usab niini nga kaniadto nang giawhag sa ilang pamilya, lakip na ang ilang inahan, si Masong nga dili na makigbalik ug puyo kang Chua tungod sa ilang kabalaka sa iyang kaluwasan.
Sa pagkakaron gipadayag sa kapulisan nga gipasakaan na og kasong murder ang suspek tungod sa mga samad nga naangkon sa biktima hinungdan sa hinanaling kamatayon niini.

